اوبريت الأطفال والصيف ... للشاعر جهاد الحكيم

اوبريت الاطفال والصيف
"""""""""👩👨👰👸""""""

إحنا الاطفال بنحب الصيف
عايشين فى مدينه او فى الريف
جوانا براءه وقلب نضيف
وشقاوه ولعب ودم خفيف
××××××××
أنا ابويا العمده وأسمي لطيف
عايش مع أهلي في حضن الريف
هاعملكوا فيها ابو العريييف
واحكيلكوا حكايتي في فصل الصيف
×××××××
انا باصحى الفجر تملى
اقرء القرآن و أصلى
أفطر وفطارى خفيف
جبنه وبيضتين فى رغيف
مع عسل النحل وقشطه
ومشلتت علشان أحلى
وأخرج لاصحابى بسرعه
نصطاد على شط الترعه
والضهر نروح على الغيط
نمسك فراشات مــ الزرعه
والعصر الشمس تزيط
تحمينا التوته الفِرعه
أرفع طيارتى بخيط
أشوى كوز دره على الولعه
وأرجع بالليل علـ البيت
العب مطشين فى الوسعه
×××××××
ما هو فصل أجازه ومن حقى
وأنا طول السنه مكتوم بُئى
مـِ الدار للدرس لمدرستى
وكمان كُتاب الشيخ رفقى
××××××
إحنا الاطفال بنحب الصيف
عايشين فى مدينه او فى الريف
جوانا براءه وقلب نضيف
وشقاوه ولعب ودم خفيف
××××××******
وأنا بُشرى السمره الأموره
أنا زهره فى جنوب الوادى
فى دراستى انا ناجحه وشطوره
الاولى على اولى اعدادى
أستنى اجازة الصيف تيجى
وأستمتع بأثار أجدادى
وحضاره من قبل العالم
ما يأررررخ هجرى وميلادى
مكتوبه على ورق البردى
منحوته على صخر بلادى
والسد العالى بشموخه
بشوفه وكأنه قصادى
××××××××
وهوايتى أرحب بالسياح
ما هو اصل السايح عندنا ضيف
لو روح بلده وكان مرتاح
راح ينقل صوره بالتشريف
ويقول على اهل بلدنا مِلاح
وهايرجع تانى معاه مصاريف
××××××××
إحنا الاطفال بنحب الصيف
عايشين فى مدينه او فى الريف
جوانا براءه وقلب نضيف
وشقاوه ولعب ودم خفيف
××××××××
وانا عزه بنت الشيخ عزوز
بدويه من ارض الفيروز
باتمنى اجازة الصيف تيجى
لاجل العب وقت ما احب واعوز
انده عـ اولاد عمى وخالى
نلعب الغاز ونحل رموز
ونئزئز لب وناكل لوز
ونحلى بمانجه وحبة موز
ونروح على حوش الخال بهروز
نطنطط زى الفرقع لوز
لم يقلد بالصوت اراجوز
××××××××
ما هو احنا البدو اللى فى سينا
عايشين ببساطه ما فيش تكليف
مانكلش بشوكه وسكينه
ولا نعرف لانشون ولا بولوبيف
رغم اننا نفس الطينه
واللى ما بيشوفش يبقى كفيف
××××××××
إحنا الاطفال بنحب الصيف
عايشين فى مدينه او فى الريف
جوانا براءه وقلب نضيف
وشقاوه ولعب ودم خفيف
××××××××
وأنا زيزو وبرقص ماكرينا
طول عمرى عايش فى مدينه
باستنى اجازة الصيف تيجى
علشان راح أصييف فى مارينا
طب يالا تعالوا اوام بينا
احكىلكوا حكايتى فى فصل الصيف
×××××××
أنا بصحى الضهر كده براحتى
وبقوم واشغل تليفزيون
وبنادى على نورهان أختى
نتفرج على افلام كارتون
وبحب الرسم فى كراستى
وعندى من الالوان ميت لون
نتغدى ونخرج مع مامتى
عـ النادى نقضى بقيت اليوم
بيقولوا عليا طويل ونحيف
تمرينى سباحه مع التجديف
والباسكيت فيه انا واد حريف
ما هو بابى الاصل وانا النيجاتيف
وعشان كده بعشق فصل الصيف
××××××
إحنا الاطفال بنحب الصيف
عايشين فى مدينه او فى الريف
جوانا براءه وقلب نضيف
وشقاوه ولعب ودم خفيف
♥ جهاد الحكيم ♥♥
— بقلمى / محمود رشدى