ده بحبك .. للشاعرة الغنائية منى عبد الرحمن

ده بيحِبِك

راح اعَوِّد حروفي الفَرْح
واعَلِّمْها كمان الرقص
تُرْقُص ڤالس
وتتمايل على الأسْطُر كما الوردة
بتتمايل على الأغصان
وانَشِّف دَمْعَها بحنان
وادواي الحُزن م الأجفان
واسهرها معايا الليل
تلاغي القَمَرة وتْغَنِّي
تقول مواويل
واطَوَّعْها ف زمام إيدي
وَأْمُر شمعها يولع
واقول يافرحة بقه إيدي
واعَلِّم قلبها يِنْسَى
وأمْحِي الذكريات مِنُّه
ولو حسيته بيعيط كِدَه اكْمِّنُّه
مايقدرشي على النسيان
هابوسه واعَدِّي على خَدُّه ورق ريحان
واوشوش روحه يِرْجَعْلِّي كما
يرجع وَلِيد ف المَهْد للِّي كان
واقوله اهْدَى مافيش أبدا سِوَى رُوحَك
تِبَات مَجْرُوح تِدَاوي إنتَ ف جْرُوحَك
ماتستناشْ إِيدين تيجي عشان تِداوِيك
ولاتقولشي علي مَعْنَى ده عايش بيك
واضُم حروفي بكفوفي
وأحضنها وادفيها
وأفرش حضني بالأحلام وأَبْنِيه بيت ويِؤْيها
واقولها إمسكي ف ضِلِّي
وإمشي السكة وَحْديكِ مافيش خِللِّي
ونادي ع الفرح يسمع ويضْحَكْلِك
وعيشي الحلم ينْدَهْلِك
يكونلِك من بَقِيةْ أهلِك
وشَعْلَقي عينِك الصافية بِسَما ربِّك
ده بيحِبِّك
ولارَدِّك ف يوم خايبة
ودايما يستجب مِنِّك
طب ادْعِيلُه
أوووي ادْعِيلُه
وقولي يارب
يارب

منى عبد الرحمن